Gul viðvörun bætist við fyrir Austurlandið á fimmtudag
Veðurstofa Íslands hefur gefið út gula veðurviðvörun fyrir fimmtudaginn en þá er von á talsverðri eða mikilli snjókomu eða skafrenningi allan þann sólarhring. Þetta bætist við óvissustig sem í gildi er fyrir nokkra þéttbýlisstaði í fjórðungnum vegna snjóflóðahættu.
Telja fræðingar Veðurstofunnar verulegar líkur á samgöngutruflunum vegna ofankomunnar á fimmtudag en glögglega sést á meðfylgjandi korti að hún verður töluverð. Því grænni sem liturinn á kortinu er því meiri er úrkoman. Spár gera ráð fyrir að hún geti orðið allt að 10 mm á klukkustund þegar verst lætur um miðjan dag. Einnig er gert ráð fyrir nokkurri úrkomu á föstudag.
Lítils háttar hlýindi eru í kortunum næstu daga fram yfir helgi en ráð er gert fyrir rauðum hitatölum allt upp í fimm stig nema yfir aðfararnótt fimmtudagsins.
Áfram verður mikil snjóflóðahætta til fjalla bæði á morgun og út fimmtudaginn.
