Ísköld og hvít jól eystra
Rúmlega 26 gráðu frost mældist á Brú á Jökuldal skömmu eftir hádegi á aðfangadag. Víðar í fjórðungnum er mjög kalt.Hitamælirinn á Brú fór niður í -26,2°C á Brú klukkan tvö í dag. Næst mesti kuldi á landinu mældist á Egilsstaðaflugvelli upp úr hádeginu, -24,2 gráður. Þar hefur frostþoka legið yfir.
Víða á svæðinu má sjá tveggja stafa frostölur, til dæmis -19 á Hallormsstað, -17 á Vopnafirði -16 á Fáskrúðsfirði, -14 á Seyðisfirði og -13 á Reyðarfirði. Heldur hlýrra er á annesjum þegar sunnar dregur, -10 á Teigarhorni og aðeins -6 á Kambanesi.
Mesta frost sem mælst hefur á Íslandi er -38 gráður í janúar árið 1918 á Grímsstöðum í Möðrudal á Fjöllum. Því má halda til haga að mesta frost sem mælst hefur í Reykjavík er -24,5 gráður, einmitt á sama tíma og frostmetið var sett á Fjöllum.
Eftir blautan nóvembermánuð kólnaði í veðri fyrir austan í byrjun desember og síðan hefur snjóað, einkum í byrjun þessarar viku. Veðrið hefur síðan róast, hætt að snjóa en kólnað duglega.
Frostið er töluvert meira en fram hafði komið í spám Veðurstofunnar. Samkvæmt þeim ætti heldur að draga úr því. Heldur hlýnar á morgun og færist hitinn þá nær frostmarki þegar líður á daginn en að sama skapi er þá von á snjókomu og vindi. Á mánudag er síðan aftur spáð meira en 10 stiga frosti.
Horft yfir Egilsstaði eftir hádegi í dag þegar þokunni létti og hlýnaði mjög lítillega í veðri. Mynd: Jóhann Hjalti
Horft úr Fellabæ að Egilsstöðum um hádegisbilið. Mynd: Björgvin Gunnarsson
