Koma til móts við óskir starfsfólks með niðurfellingu leikskólagjalda
Fræðslunefnd Fjarðabyggðar leggur til að foreldrar barna í leikskólum sveitarfélagsins geti sótt um niðurfellingu skólagjalda á tilteknum tímum ársins. Þannig aukist sveigjanleiki sveitarfélagsins gagnvart óskum starfsmanna um frí og leyfi frá störfum.
Nefndin tók þetta fyrir á síðasta fundi sínum en ástæðan eru auknar óskir starfsfólks leikskólanna um leyfi eða frí frá störfum en þær óskir tengjast uppsöfnun réttinda vegna styttingar vinnuvikunnar.
Verði þetta samþykkt í bæjarráði Fjarðabyggðar eiga foreldrar barna á leikskólum að geta fengið niðurfellingu leikskólagjalda milli jóla og nýárs, í dymbilvikunni og meðan vetrarfrí standa yfir í grunnskólum. Vonast er til að foreldrar grípi tækifærið til að gefa börnum sínum frí yfir þessi tímabil. Enginn aukakostnaður verður af slíkri ráðstöfun að mati fræðslunefndarinnar fyrir sveitarfélagið.
