Líkur á snjókomu á gamlárskvöld
Líkur eru á að um kvöldmat á gamlárskvöld byrji að snjóa á Austurlandi. Magnið verður samt ekki slíkt að það hamli brennum eða flugeldaskotum þótt eitthvað gæti dregið úr skyggni.Framan af degi er útlit fyrir vestanvind, 8-13 m/s en bjartviðri. Þegar líður á daginn lægir. Um kvöldið snýst í austanátt, 8-13 m/s með snjókomu og jafnvel skafrenningi.
Von er á þessum úrkomubakka um klukkan sjö eða átta um kvöldið. Þær upplýsingar fengust hjá Veðurstofu Íslands í morgun að snjókoman verði ekki veruleg og ekkert eigi að vera því til fyrirstöðu að kveikja í áramótabrennum eða skjóta upp flugeldum þótt snjómuggan geti mögulega dregið úr skyggni þannig að ekki sjáist vel upp í himininn.
Von er á að hvassara verði út við ströndina heldur en inn til landsins og veðrið eystra verður væntanlega töluvert betra en á Suður- og Vesturlandi þar sem gular viðvaranir verða í gildi.
Á nýársnótt snýst vindur síðan til norðurs og hvessir þá eilítið. Á nýársdag lægir aftur. Spár fyrir nýárið gera jafnvel ráð fyrir rigningu og hita á mánudagskvöld en Veðurstofan bendir á að enn sé of mikið flökt í spám til að slá nokkru föstu um það.
Í morgun hefur verið unnið að moka snjó af vegum eftir ofankomu og kóf síðustu daga. Varað er við að leiðir séu einbreiðar á köflum svo sem í Fellum, Fagradal og Suðurfjörðum. Víða er enn kóf eða snjókoma og hált þótt vegirnir séu orðnir þokkalega færir.
Þá vinna sveitarfélögin að því að ryðja götur í þéttbýli. Í Fjarðabyggð hafa biluð tæki tafið fyrir vinnunni á Eskfirði og í Neskaupstað síðustu daga.