Með köldustu desembermánuðum austanlands í áratugi
Liðinn desembermánuður var með þeim allra köldustu bæði austanlands sem og á landsvísu samkvæmt gögnum Veðurstofu Íslands. Heilt yfir var þetta kaldasti desember í landinu síðan 1973.
Lægsti meðalhiti mánaðarins í byggð á láglendi mældist á Egilsstöðum eða -5,9 stig sem er jafnframt næstkaldasti desember þar í bæ síðan 1991. Það hvorki meira né minna en -4,8 stigum lægri hiti en að meðaltali yfir það tímabil. Lægsti meðalhiti á landsvísu fékkst á Möðrudal eða -9,4 stig. Þar mældist sömuleiðis mest frostið í mánuðinum þegar mælirinn datt niður í -27,1 stig á aðfangadag jóla.
Svipaða sögu er að segja af Dalatanga og Teigarhorni. Meðalhitastigið á Dalatanga mældist -1,5 stig sem einnig er næstkaldasti desember samkvæmt mælum í rúmlega 30 ár. Að Teigarhorni var meðalhiti -3,4 stigum lægri en undanfarna áratugi.
Það var þó líka á Austurlandi sem hæsti hiti liðins mánaðar mældist en það gerðist á Seyðisfirði þann 1. desember þegar hitinn náði 14,4 stigum.