Mikil forföll í Djúpavogsskóla gætu tengst Covid
Um helmingur nemenda og þriðjungur kennara við Djúpavogsskóla eru fjarri góðu gamni vegna ýmis konar veikinda. Hugsanlega er í tilfellum um Covid-smit þar að ræða.
Skólastjóri Djúpavogsskóla, Þorbjörg Sandholt, segir forföll óvenjulega mikil í gær og í dag en með samstilltu átaki þeirra sem eftir eru hefur tekist að halda uppi skólastarfinu með sæmilega eðlilegum hætti.
Hún vill ekki fastsetja að hér geti verið um nýjan Covid-faraldur að ræða enda liggi ekkert fyrir um það. Veikindi almennt séu töluverð á þessum tíma en hún hefur haft fregnir af staðfestum tilvikum Covid meðal bæjarbúa.
„Ég hef fregnað það að það hafa tilvik Covid komið upp hér upp á síðkastið en hvort það er bein tenging við forföllin í skólanum get ég ekki sagt til um. Ég hins vegar sjálf vill hafa vaðið fyrir neðan mig og því mætti ég til vinnu í gær með grímu og það vakti svo mikla athygli að í dag mættu allnokkrir aðrir með grímur líka. Það er ekki mikið meira sem við getum gert en notað grímu og þvegið okkur vel og vandlega um hendur á þessu stigi.“
Vegna veikindahrinunnar í bænum hefur einnig verið ákveðið að fresta tímabundið þorrablóti Djúpavogsbúa.
Ekki náðist í sóttvarnarlækni eða framkvæmdastjóra lækninga hjá Heilbrigðisstofnun Austurlands.
