Minnka veiðikvóta eftir fund hreindýraráðs
Náttúrustofa Austurlands hefur endurskoðað tillögu sína um hreindýrakvóta næsta árs og verður kvótinn minnkaður í 901 dýr á næsta ári.
Þetta varð ljóst eftir fund hreindýraráðs í gær en þar voru upphaflegar tillögur Náttúrustofu um að heimila veiðar á 938 dýrum kynntar og ræddar auk þess sem fjórar athugasemdir sem gerðar voru vegna fyrri tillögu voru teknar fyrir. Niðurstaðan sú að minnka kvótann um 37 dýr en það kemur í hlut umhverfis- og auðlindaráðuneytis að taka lokaákvörðun innan tíðar.
Eins og kunnugt er fundust mun færri dýr við talningar fyrr á árinu en talning síðasta árs hafði gefið til kynna og talið víst að nokkur fækkun hafi orðið á stofninum hér austanlands sem er þvert á það sem lagt var upp með. Hefur Náttúrustofa tekið mið af þeirri stöðu við kvótatillögur nú.
