Múlaþing þarf hugsanlega að draga úr fjárfestingum og framkvæmdum
Hafin er vinna á því hjá Múlaþingi hvort draga þurfi úr þeim fjárfestingum og framkvæmdum sem gert var ráð fyrir í fjárhagsáætlun sökum forsendubrests.
Þetta kom fram í máli Björns Ingimarssonar, sveitarstjóra Múlaþings, á síðasta fundi sveitarstjórnar en hann sjálfur hefur ekki um langt skeið upplifað jafn mikilar forsendubreytingar og orðið hafa á skömmum tíma. Þar vísar sveitarstjórinn í þróun verðlags og launa upp á síðkastið en verðbólga í landinu hefur sem kunnugt er hækkað drjúgt síðustu mánuði með tilheyrandi áhrifum á flestar vísitölur.
Björn segir að ef yfirstandandi greiningarvinna sýni að viðmið við upphaflega fjárhagsáætlun gangi ekki upp þurfi að haga seglum eftir þeim vindi.
„[...]Eins og hefur komið aðeins fram í umræðum hér þá eru ýmsar forsendur sem fjárhagsáætlun byggir á sem hafa tekið breytingum. Það er verðlagsþróun og launaþróun. Þetta leiðir til þess að óhjákvæmilegt er annað en að taka til skoðunar hvort raunhæft er að ráðast í allar þær fjárfestingar, framkvæmdir eða rekstraráherslur sem gert er ráð fyrir í núgildandi fjárhagsáætlun. Við horfum til ákveðinna viðmiða varðandi framlegð rekstrar og skuldsetningar og ef við sjáum ekki fram á að við náum þeim markmiðum sem við höfum sett okkur þá munum við verða að bregðast við með ákveðnum hætti.“
