Mygla staðfest í skóla og íþróttahúsi Eskifjarðar
Mygla hefur verið staðfest í bæði húsnæði grunnskóla Eskifjarðar og íþróttahúsi staðarins í sýnum sem tekin voru þar fyrir áramót. Fjarðabyggð vinnur í dag að nánari greiningum og viðbrögðum á niðurstöðunum.Eskfirðingar hafa þrýst á aðgerðir í húsunum eftir ítrekuð lekavandamál þar, einkum í íþróttahúsinu síðustu misseri. Fyrir áramót voru tekin þar myglupróf af verkfræðistofunni Eflu og bárust niðurstöður þess í gærkvöldi.
Samkvæmt tilkynningu sem Fjarðabyggð sendi frá sér fyrir hádegið, meðal annars í kjölfar fyrirspurna Austurfréttar, kemur fram að í skólanum hafi greinst mygla í fundarherbergi, anddyri á annarri hæð skólans og kennslustofu 312 sem er á þriðju hæð. Kennslustofan var tekin úr notkun í haust vegna gruns um myglu.
Í íþróttahúsinu, sem stendur við skólann, greindist mygla í suðausturvegg hússins en ekki úr öðrum sýnum.
Samkvæmt upplýsingum sem fengust hjá Fjarðabyggð í morgun eru starfsmenn framkvæmdasviðs Fjarðabyggðar í dag að fara nánar yfir skýrsluna til að átta sig nánar á umfangi myglunnar og til hvaða aðgerða þurfi að grípa.
Í tilkynningunni kemur fram að vinnan verði í nánu samstarfi við sérfræðinga Eflu, skólastjórnendur, foreldra, nemendur og starfsfólk skólans. Stefnt er að fundi í næstu viku með starfsfólki og sérfræðingum Eflu.