Öll hreyfing stöðvast á Seyðisfirði
Fréttir • This email address is being protected from spambots. You need JavaScript enabled to view it. • Fyrst birt 01. des 2022 12:00 • Uppfært 01. des 2022 12:00
Ekki er lengur talin ástæða til að vara við umferð um skriðu- og lækjarfarvegi á Seyðisfirði líkt og verið hefur í rúma viku og göngustígur upp með Búðará er opinn á ný. Öll hreyfing sem verið hefur á fjallshlíðunum þar hefur stöðvast.
Þetta kemur fram í yfirliti Veðurstofu Íslands sem hefur verið daglegt undanfarnar vikur. Staðan nú þykir orðin það trygg að ekki verða daglegar tilkynningar þótt áfram verði fylgst með svæðinu.
Þurrt hefur verið á Seyðisfirði síðan á sunnudagskvöld. Ekki er spáð úrkomu aftur fyrr en í lok næstu viku og þá búist við snjókomu.
Allar jarðvegshreyfingar hafa stöðvast, þar með talið á hryggnum utan við Búðará sem færðist um 12 sm. í vætutíðinni í nóvember.
Vatnshæð hefur lækkað í öllum borholum nema einni sem stendur í stað. Búist er við að vatnsstaðan lækki áfram í ljósi þess að þurrt er orðið í veðri.
Á Fljótsdalshéraði hefur vatnshæð Lagarfljóts við Fellabæ hækkað um 10 sm. í morgun. Hún er þó mun lægri en í flóðinu fyrir rúmri viku og má segja að fljótið sé aftur farið að nálgast eðlilegt rennsli.
