Opna Norðfjarðargöngin fyrir umferð
Norðfjarðargöng voru nú síðdegis opnuð fyrir umferð á ný eftir að hafa verið lokuð síðan seint á sunnudagskvöldið.
Opnun ganganna milli Eskifjarðar og Neskaupsstaðar nú klukkan 17 kom klukkustund síðar en opnun vegarins yfir Fagradal milli Egilsstaða og Reyðarfjarðar og því gat stór hópur björgunarsveitarfólks sem beðið hefur á Egilsstöðum í rúman sólahring loks haldið leiðar sinnar til aðstoðar í Neskaupstað.
Mikil snjóflóðahætta er enn fyrir hendi samkvæmt Veðurstofu Íslands og þrengingar eru á veginum í og við göngin. Vegfarendur beðnir um að fara um þau með mikilli aðgát.
Vegagerðin varð þó að loka veginum á milli Breiðdalsvíkur og Fáskrúðsfjarðar síðla í dag en umferð þar gekk ekki sem skyldi eins og fram kemur á vef stofnunarinnar. Fylgdarakstur verður þó í boði þessa leiðina eitthvað fram á kvöld.
