Samningur vegna lóðar orkugarðs undirritaður
Sveitarfélagið Fjarðabyggð og Fjarðarorka, félag í eigu danska fjárfestingafélagsins Copenhagen Infrastructure Partners, undirrituðu í gær samning um leigu lóðar í Reyðarfirði undir væntanlega rafeldsneytisverksmiðju Fjarðarorku.Um er að ræða samanlagt 38 hektara landssvæði úr landi jarðanna Hólma og Flateyrar í Reyðarfirði, sem eru í eigu sveitarfélagsins.
CIP, í samstarfi við fleiri aðila, vinnur þar að áformum um uppbyggingu Orkugarðs Austurlands. Þungamiðjan í honum er framleiðsla á rafeldsneyti fyrir skip og bíla þar sem grunnurinn er vetnið búið til þegar vatn er klofið í frumeindir sínar með rafmagni.
Í tilkynningu Fjarðabyggðar frá í morgun segir að um sé að ræða fyrsta lóðarleigusamninginn á Austurlandi undir starfsemi sem þessa og sé hann því afar mikilvægur fyrir áframhaldandi uppbyggingu orkugarðsins.
„Lóðarleigusamningurinn er mikilvægur áfangi á leiðinni að rafeldsneytisframleiðslu á Reyðarfirði og uppbyggingar á Orkugarðinum og styður við markmið ríkisstjórnarinnar og sveitarfélagsins í umhverfis- og loftslagsmálum. Til að ná árangri í baráttunni við loftslagsbreytingar verður að skipta jarðefnaeldsneyti út fyrir umhverfisvænni kosti, og hér hefur verið stigið ákveðið skref í þá átt. Um leið er ég mjög ánægður með að Fjarðabyggð sé að skapa sér sess sem ákveðin miðstöð orkuskipta á Íslandi,“ er þar haft eftir Jóni Birni Hákonarsyni, bæjarstjóra.
Við framleiðsluna verða til aukaafurðir,svo sem varmi og súrefni, sem nýta á til frekari verðmætasköpunar á svæðinu. Meðal annars er til skoðunar uppbygging hitaveitu í Fjarðabyggð, áburðarframleiðsla á umhverfisvænni hátt en nú auk annarra hugmynda.
Samningurinn var samþykktur samhljóða í bæjarstjórn Fjarðabyggðar fyrir viku. Samningurinn er til 35 ára, frá 1. janúar 2026 en við ákveðnar aðstæður má framlengja upphaf samningstíma um tvö ár. Á íbúafundi fyrir jól skýrði Jón Björn frá því að samningurinn gerði CIP kleift að ráðast í nauðsynlegar rannsóknir á svæðinu fyrir umhverfismat en stefnt er að því að það verði tilbúið í lok árs 2025.
Frá undirritun samningsins í gær. Fremri röð frá vinstri: Jón Björn Hákonarson, bæjarstjóri Fjarðabyggðar, Magnús Bjarnason, stjórnarformaður Fjarðarorku og Jón Sveinsson, lögfræðingur Fjarðabyggðar. Aftari röð frá vinstri: Stefán Þór Eysteinsson, formaður bæjarráðs, Hjördís Helga Seljan Þóroddsdóttir, forseti bæjarstjórnar, Kristinn Þór Jónasson bæjarfulltrúi og Þuríður Lillý Sigurðardóttir bæjarfulltrúi. Mynd: Fjarðabyggð