Tókst að bjarga hlöðunni – Myndir
Mikið tjón þegar smíðaverkstæði í aflögðum fjárhúsum við bæinn Víðivelli Ytri 1 í Fljótsdal brann í kvöld. Slökkviliðið náði naumlega að bjarga áfastri hlöðu og því sem í henni var.Tilkynning um eldinn barst klukkan níu. Í félagsheimilinu Végarði, í beinni sjónlínu hinu megin í dalnum, var verið að undirbúa þorrablót á morgun. Húsráðandi hafði verið þar á meðal en brugðið sér yfir til að ná í smíðaefni þegar hann kom að reiknum.
Fólk úr þorrablótsnefndinni, þar á meðal ritstjóri Austurfréttar, varð því fyrst á staðinn. Þá var samt ljóst að ekkert yrði við eldinn ráðið enda strekkingsvindur á svæðinu sem stóð upp á innri hlið hússins.
Slökkvilið frá Egilsstöðum kom á vettvang um kortér fyrir tíu. Mótvindur og fljúgandi hálka tafði ferðina. Þegar slökkviliðið kom hafði vindinn lægt nokkuð og gekk slökkvistarf nokkuð vel.
„Þegar við komum var húsið alelda. Við náðum engu að síður að bjarga hlöðunni. Það var byrjað að brenna í gegn milli hlöðunnar og fjárhússins og við byrjuðum að slökkva í því.
Erfitt að við komum á staðinn hefur slökkvistarfið gengið hnökralaust. Það tók tíma að komast hingað vegna fjarlægðar og færðar en ekki langan miðað við það,“ sagði Ingvar Birkir Einarsson, aðstoðarslökkvistjóri, sem stýrði aðgerðum, í samtali við Austurfrétt upp úr klukkan ellefu í kvöld.
Slökkvistarf var þá langt komið. „Við förum að pakka saman en skiljum eftir einhverja til að vakta húsið fram á nóttina. Eins og alltaf þegar þak fellur niður þá er glóð og fleira sem erfitt er að ná til.“
