Umfangsmikil rýming á Seyðisfirði

Á Seyðisfirði er verið að rýma svæði á reitum 4, 5, 6, 7, 14, 16, 17 og 18 samkvæmt rýmingarkorti Veðurstofunnar.

Hærri tölurnar eru í norðanverðum firðinum undir fjallinu Bjólfi. Þar á meðal eru tvær blokkir á Bakkasvæði og byggðin á Eyrinni. Á þessu svæði er töluvert um íbúðarhúsnæði.

Lægri númerin eru í sunnanverðum firðinum undir Strandartindi. Svæðið byrjar við frystihúsið og nær út fyrir það. Þar er mest um að ræða atvinnuhúsnæði. Þar innan við er svæðið sem skriðurnar féllu á í desember 2020. Engin rýming er í gangi þar.

Í Neskaupstað hafa hús undir Nesgili og Bakkagili verið rýmd en það svæði er í ytri hluta miðs staðarins. Efsta húsaröð undir varnargörðum var rýmd í öryggisskyni auk atvinnuhúsnæðis innst í bænum.

Bæði á Seyðisfirði og Norðfirði hefur hættustigi verið lýst yfir. Félagsheimilin Herðubreið og Egilsbúð gegna hlutverki fjöldahjálparmiðstöðva.

Þær upplýsingar fengust hjá almannavörnum að gripið væri til aðgerðanna í öryggisskyni. Viðbragðsaðilar hafa nú náð góð yfirsýn á stöðu mála en áfram er fylgst náið með. Tilmæli um að fólk haldi sig heima við eru enn í gildi.

Gul veðurviðvörun vegna snjókomu og skafrennings hefur verið framlengd til klukkan sjö í kvöld.

--Samkvæmt yfirliti frá lögreglu eru eftirfarandi hús á Seyðisfirði rýmd og íbúar beðnir um að mæta í Herðubreið til skráningar.