Hvernig er spáð að veðrið gangi yfir Austfirði?
Úrkoma, sem síðar færist norðar eftir Austfjörðum, er byrjuð á Teigarhorni í Berufirði. Tvær veðurviðvarnir eru í gildi fyrir Austfirði á morgun, önnur vegna snjókomu, hin vegna asahláku. Hætta er á að vegir lokist og rafmagnstruflunum fram til föstudag.„Það er að koma lægðardrag upp að Austfjörðum. Lítilsháttar úrkoma byrjuð á Teigarhorni og er viðloðandi víðar. Til fjalla er snjókoma. Úrkoman færist norðar, að Eskifirði og Norðfirði, þegar líður á daginn og kvöldið og bætir í.
Þetta er mest snjókoma, mögulega slydda einhvers staðar á láglendi. Hún er umtalsverð, ákefðin er allt að 10 mm. á klukkustund,“ segir Eiríkur Örn Jóhannsson, veðurfræðingur á Veðurstofu Íslands.
Veðurstofan gaf í morgun út nýjar veðurviðvaranir fyrir Austfirði, það er svæði sunnan frá Djúpavogi norður að Borgarfirði. Appelsínugul viðvörun vegna snjókomu tekur gildi klukkan sjö í kvöld en klukkan þrjú á morgun bætist við gul viðvörun vegna asahláku.
„Þetta er nokkuð sérstakt veður og óvenjulegt fyrirkomulag. Um hádegi á morgun fer að hlýna og rigna sunnan til á Austfjörðum. Norðar á svæðinu, einkum norðan Eskifjarðar, verður snjókoma sem að endingu verður að rigningu aðfaranótt föstudags eða á föstudagsmorgun.“
Báðar viðvaranirnar gilda til miðnættis annað kvöld. Verklag Veðurstofunnar er þannig að viðvaranir hafa takmarkaðan gildistíma en líkur eru á að viðvaranirnar verði lengdar fram á föstudag. Úrkomu er von um allt Austurland á morgun en þar er ekki slíkt snjómagn fyrir að ástæða þyki til að vara sérstaklega við henni.
Landsnet sendi undir hádegi frá sér viðvörun vegna hættu á ísingu á raflínur frá Höfn að Seyðisfirði og þar með rafmagnstruflunum.
Vegagerðin hefur varað við því að líkur séu á að færð verði erfið á næstu daga. Lokað hefur verið yfir Fjarðarheiði í dag þar sem mokstursbíll festist í morgun. Gríðarlega mikill snjór er á svæðinu eins og sjá má á meðfylgjandi myndum frá Vegagerðinni sem teknar voru undir Grænafelli í gær. Þar eru komin snjógöng sem fyllast fljótt þegar skefur í.
Frá Fagradal í gær. Myndir: Vegagerðin
