Mikill samdráttur í verslun
Tæplega 17% samdráttur er í dagvöruverslun í mars á föstu verðlagi miðað við sama mánuð í fyrra. Þetta er mesti samdráttur á einu ári, sem mælst hefur frá því að farið var að birta smásöluvísitölu árið 2001.
Niðurstöður Rannsóknaseturs verslunarinnar á Bifröst, sem tekur saman veltu í dagvöruverslun, eru að mest dragist húsgagna- og raftækjaverslun saman, en velta í húsgagnaverslun minnkaði um tæp 55% og í raftækjaverslun um rúm 50%. Minnstur var samdrátturinn á smásölu á skóm eða um 5,8%. Stöðugur samdráttur hefur verið í verslun frá því í haust eða síðan bankahrunið varð.
