Varðskip dregur á dópskútu
Varðskip Landhelgisgæslunnar eltir nú meinta smyglskútu djúpt undan Suðausturlandi og munu vonir bundnar við að takist að ná skútunni innan skamms. Hún er sögð komin yfir miðlínu milli Íslands og Færeyja. Reynt verður að færa skútuna til hafnar, væntanlega á Austurlandi. Sérsveit ríkislögreglastjóra er í viðbragðsstöðu um borð í varðskipinu. Óljóst er hvaðan skútan er, en hún mun skráð erlendis. Ekki er vitað hversu margir eru um borð.
Einungis hefur verið staðfest að um fleiri en eina tegund fíkniefna sé að ræða, en visir.is segir magnið yfir hundrað kíló og séu fyrir því áreiðanlegar heimildir. Mennirnir sem voru handteknir við Djúpavog og Höfn hafa nú verið hnepptir í þriggja vikna gæsluvarðhald.
Ljósmynd/Týr (úr myndasafni Landhelgisgæslunnar)
