Sjálfstæðismenn á Héraði leita að nýjum bæjarfulltrúum
Fréttir • This email address is being protected from spambots. You need JavaScript enabled to view it. • Fyrst birt 26. nóv 2013 16:00 • Uppfært 27. nóv 2013 14:17
Sjálfstæðismenn á Fljótsdalshéraði þurfa að finna nýja fulltrúa til að bjóða sig fram til setu í bæjarstjórn sveitarfélagsins í sveitarstjórnarkosningum í vor. Enginn þeirra þriggja sem setið hefur sem aðalmaður fyrir hönd flokksins gefur kost á sér áfram.
Sjálfstæðismenn á Héraði hittust nýverið á félagsfundi til að hefja undirbúning fyrir kosningarnar. Ekki er búið að ákveða hvernig stillt verður upp á listann en verið er að mynda kjörnefnd.
Flokkurinn fékk aðeins einn mann inn í síðustu sveitarstjórnarkosningum. Þrír fulltrúar hafa hins vegar skipt með sér stöðunni. Í samtali við Austurfrétt upplýsti Þórhallur Harðarson, formaður fulltrúaráðs sjálfstæðisfélaga á Fljótsdalshéraði og Borgarfirði, að ólíklegt væri að nokkur þeirra yrði í forustusveitinni í vor.
Guðmundur Ólafsson leiddi flokkinn í síðustu sveitarstjórnarkosningum en hætti skömmu eftir þær þar sem hann tók við starfi útibússtjóra Arion-banka.
Næst á lista var Katla Steinsson en hún flutti af svæðinu fyrr á þessu ári. Undanfarna mánuði hefur Karl S. Lauritzson verið aðalfulltrúi í bæjarstjórn. Hann gefur ekki kost á sér til setu í bæjarstjórn en ekki er útilokað að hann taki sæti neðar á listanum.
