Hæstiréttur hafnaði lögbanni SSA á ferðir Sternu
Hæstiréttur hefur staðfest dóm héraðsdóms Austurlands frá því í vor sem hafnaði staðfestingu á lögbanni sýslumannsins á Höfn á akstur Sternu á milli Hafnar og Egilsstaða. Samband sveitarfélaga á Austurlandi (SSA) höfðaði málið þar sem það taldi brotið á einkaleyfi félagsins til að skipuleggja almenningssamgöngur á svæðinu.Það var í árslok 2011 sem Vegagerðin framseldi einkaleyfi sitt til að skipuleggja almenningssamgöngur á Austurlandi til SSA en því fylgdi einnig 45 milljóna króna stuðningur.
Vorið 2012 auglýsti Sterna hins vegar sumarferðir á milli Hafnar og Egilsstaða með sex viðkomustöðum á milli þar sem farþegar gátu hoppað inn og út. SSA taldi aksturinn brjóta gegn einkaleyfinu og að loknum bréfaskrifum til Sternu var fengið lögbann á aksturinn í júlí 2012.
Hvorki héraðsdómur né Hæstiréttur féllust á að staðfesta lögbannið. Farþegar Sternu keyptu svokallaða hringmiða og í dómi Hæstaréttar segir að þeir hafi aðeins getað nýtt þá í ferðir umhverfis landið en ekki til að kaupa sér far milli einstakra viðkomustaða. Þannig hafi ferðirnar ekki verið öllum opnar og brjóti því ekki gegn einkaleyfinu.
Í dómi Hæstaréttar er hins vegar bent á að kynning Sternu á ferðunum á vef félagsins vorið 2012 hafi ekki verið í samræmi við lýsingar forsvarsmanna fyrirtækisins fyrir dómi enda var henni breytt.
Fimm hæstaréttardómarar kváðu upp dóminn. Hvor málsaðili ber sinn hluta málskostnaðar í héraðsdómi en SSA var dæmt til að greiða hálfa milljón króna í málskostnað fyrir Hæstarétti.
