HSA: Upphæðin kemur á óvart
Fréttir • This email address is being protected from spambots. You need JavaScript enabled to view it. • Fyrst birt 16. jan 2014 14:00 • Uppfært 16. jan 2014 14:00
Forstjóri Heilbrigðisstofnunar Austurlands segir það hafa komið á óvart hversu háar bætur stofnunin hafi verið dæmd til að greiða fyrrverandi yfirlækni í Fjarðabyggð fyrir vangoldin laun. Ákvörðun um framhald málsins verður þar tekin á næstu dögum.
„Niðurstaðan kemur í sjálfu sér ekki á óvart en þó átti ég von á að fjárhæðin yrði heldur lægri en raunin varð," segir Kristín B. Albertsdóttir, forstjóri stofnunarinnar.
Héraðsdómur Austurlands dæmdi í gær HSA til að greiða Hannesi Sigmarssyni, fyrrverandi yfirlækni í Fjarðabyggð, tæpar 15 milljónir króna fyrir vangoldin laun frá júlí 2009 til apríl 2010.
Dómurinn taldi að HSA hefði ekki verið heimilt að taka Hannes einhliða af launaskrá í júlímánuði 2009. Honum var síðar sagt upp störfum í desember sama ár með fjögurra mánaða uppsagnarfresti.
Málsvörn HSA byggðist meðal annars á því að Hannes hefði ráðið sig erlendis í vinnu og stofnað eigið fyrirtæki án þess að tilkynna stofnuninni um það. Varakrafa stofnunarinnar byggðist meðal annars á að arður fyrirtækisins yrði dregin frá kröfu Hannes.
Á það féllst dómurinn ekki en lækkaði þess í stað skaðabæturnar í samræmi við þau laun sem Hannes ávann sér á uppsagnarfrestinum.
„Við munum fara yfir dóminn og taka ákvörðun um framhaldið í samráði við ríkislögmann," sagði Kristín í svari við fyrirspurn Austurfréttar.
