Páll hættir sem sveitarstjóri Breiðdalshrepps
Páll Baldursson hefur ákveðið að hætta sem sveitarstjóri Breiðdalshrepps eftir kosningar í vor. Hann segir tíma vera kominn til að breyta til eftir átta ára starf.„Það er nokkuð langt síðan ég ákvað þetta," staðfestir Páll. Hann hyggst flytja með fjölskyldu sinni í Egilsstaði en eiginkona hans er þaðan.
Páll bauð sig fram til sveitastjórnar í Breiðdalshreppi vorið 2006 og tók við sem sveitarstjóri að loknum kosningum auk þess að sitja í sveitastjórninni. Hann var ekki á lista fyrir síðustu kosningar en var ráðinn sveitarstjóri áfram.
„Í vor verða komin átta ár í þessu starfi og ég held það sé bara bæði gott fyrir mig og aðra að breyta til varðandi þetta," sagði Páll í samtali við Austurfrétt.
Aðspurður segist hann ekki vera búinn að ákveða hvað hann taki sér fyrir hendur frá og með vorinu og sé í raun „furðu lítið farinn að hugsa út í það."
