Búið að loka Fjarðarheiði: Björgunarsveitir kallaðar út til að losa bíla
Fréttir • This email address is being protected from spambots. You need JavaScript enabled to view it. • Fyrst birt 18. mar 2014 15:54 • Uppfært 18. mar 2014 15:54
Björgunarsveitin Ísólfur var í dag kölluð út á Fjarðarheiði til að losa fjóra bíla sem þar sátur fastir. Ferðamenn eru áminntir um að virða lokanir vega.
Þetta kemur fram í frétt frá Landsbjörg. Fleiri austfirskar sveitir hafa verið kallaðar út í dag en bíll var sendur frá Egilsstöðum til að sækja fólkið sem var í bílunum á Fjarðarheiði til byggða.
Þá var björgunarsveitin Jökull á Jökuldal einnig kölluð út til að sækja bíl sem var fastur á Jökuldalsvegi.
Í tilkynningu Landsbjargar er brýnt fyrir vegfarendum að vera ekki á ferðinni á fjallvegum nema á mjög vel búnum bílum, að ferðast ekki einbíla þar sem veður er vont og færð slæm og skilja alltaf eftir ferðaáætlun þar sem fram kemur væntanlegur komutími á áfangastað. Einnig skal ávalt virða lokanir vega.
Ófært er og óveður á Fjarðarheiði og ófært um Vatnsskarð til Borgarfjarðar. Þungfært er á Möðrudalsöræfum og snjóþekja á flestum öðrum vegum á Austurlandi.
