Aprílgabb: Flug fram og til baka á 10.000 krónur: Vilja bjóða Austfirðingum í vorið
Fréttir • This email address is being protected from spambots. You need JavaScript enabled to view it. • Fyrst birt 01. apr 2014 10:08 • Uppfært 02. apr 2014 13:40
Flugfélag Íslands býður í dag Austfirðingum tilboðsverð á flugi á milli Reykjavíkur og Egilsstaða. Umdæmisstjóri Flugfélagsins segir það með þessu vilja koma til móts við Austfirðinga sem þrái vorið eftir snjóþungan vetur.
„Austfirðingar hafa verið innilokaðir langtímum saman í vetur vegna snjóa og óveðra. Þess vegna viljum við gefa þeim tækifæri til að lyfta sér upp," segir Halldór Örvar Einarsson, umdæmisstjóri Flugfélags Íslands.
Tilboðið er einskorðað við íbúa á Austurlandi og þess vegna er aðeins hægt að bóka það í afgreiðslu Flugfélags Íslands á Egilsstaðaflugvelli í dag. Takmarkað sætaframboð er í boði en hægt er að fljúga fram og til baka á 10.000 krónur fram til 1. maí.
„Okkur hjá Flugfélaginu langaði til að koma vel til móts við íbúa hér á svæðinu, enda umræða um flugið verið á neikvæðum nótum að undanförnu. Við hvetjum alla Austfirðinga til að notfæra sér þetta frábæra tilboð og kíkja á okkur sem fyrst áður en sætin klárast."
