Ekki kennt í dymbilviku þrátt fyrir verkfall
Bætt verður aftan á skólaárið í austfirskum framhaldsskólum og kenndur einn laugardagur til að vinna upp kennslu sem glatast hefur út af kennaraverkfalli. Ekki verður kennt í dymbilviku.Samkvæmt nýgerðum samningum framhaldsskólakennara og ríkisins bætast við sex auka kennsludagar til að vinna upp verkfallið sem stóð í þrjár vikur.
Í Verkmenntaskóla Austurlands bætist ein kennsluvika við í maí nema í þeim áföngum sem kenndir voru í verkfallinu. Þar hefst prófatímabil 12. maí en átti að hefjast 5. maí.
Laugardeginum 17. maí er bætt við sem prófadegi og prófunum þjappað saman á styttra tímabil en áður var fyrirhugað. Þeim lýkur með sjúkraprófum 21. maí í stað 16. maí.
Í bréfi sem skólameistari sendi frá sér í vikunni segir að til greina komi að byrja prófin laugardaginn 12. maí en það komi í ljós þegar prófatafla liggi fyrir að loknu páskafríi.
Breytingarnar í VA hafa hvorki áhrif á páskafrí né brautskráningu.
Í Menntaskólanum á Egilsstöðum verður kennt á laugardaginn og byrjað strax aftur þriðjudaginn eftir páska. Prófadögum er fækkað um einn og prófatíma hliðar til þannig að þeim lýkur 19. maí í stað 16.
Þar verður einnig kennt á sumardaginn fyrst og 1. maí. Þá er kennt 12. og 13. maí og próf hefjast svo strax 14. maí og taka fjóra daga.
Breytingarnar hafa engin áhrif á útskrift sem verður laugardaginn 24. maí.
