Truflun frá stóriðju á suðvesturlandi olli rafmagnsleysi á Austurlandi
Truflun frá stóriðju á suðvesturlandi hleypti af stað keðjuverkunum í rafkerfi landsins sem olli um tveggja tíma rafmagnsleysi víða um Austurland á mánudagskvöld. Raftæki skemmdust í spennusveiflunum. Skerða hefur þurft orku til raforkunotenda á Austurlandi að undanförnu vegna lágrar vatnsstöðu í Hálslóni.Truflanirnar hófust þegar álag frá stóriðjunni leysti út. Við það var raforkukerfinu skipt upp í landshlutabundnar eyjar til að takmarka sveiflurnar. Ragnar Guðmannsson, yfirmaður stjórnstöðvar Landsnets, segir að framan af hafi allt gengið eðlilega, fyrir utan að eldingavari hafi farið við Höfn í Hornafirði.
Hins vegar hafi orðið bilun í búnaði á Hólum við innsetningu línu þar sem orsakaði aflsveiflur þegar kerfin voru tengd saman á ný.
Í tilkynningu sem Landsnet sendi frá sér í dag segir að ástæður truflananna séu „fyrst og fremst raktar til þess að byggðalínan er rekin á þanmörkum." Því séu þær „enn og aftur áminning um mikilvægi þess að styrkja tengingu meginflutningskerfisins milli norður- og suðurhluta landsins."
Hjá RARIK fengust þær upplýsingar að „blikk" hefði orðið um allt Austurland og rafmagnslaust á Höfn og Austur-Skaftafellssýslu, Norðfirði, Breiðdalsvík og í stuttan tíma á Borgarfirði eystri. Lengst varði rafmagnsleysið á Breiðdalsvík, í um tvo klukkutíma.
Dæmi er um að raftæki hafi skemmst í flöktinu. „Það hefur lítið verið haft samband út af bilunum en maður hefur þó heyrt um eitthvað," sagði Ólafur Birgisson, deildarstjóri RARIK á Austurlandi.
Á vef RARIK má nálgast tjónaeyðublað sem notendur geta fyllt út og komið til rafmagnsveitnanna. Því blaði verður síðan komið áfram til viðeigandi aðila, í þessu tilfelli til Landsnets.
Þá hafa notendur umframorku búið við skerðingar að undanförnu sem rakin er til lágrar vatnsstöðu í Hálslóni. Sú ráðstöfun hefur einkum bitnað á fiskvinnslum sem rafvæðst hafa í auknu mæli. Sú skerðing hefur bæði náð yfir Norður- og Austurland.
