Sigrún Blöndal: Hugmyndir um sameiningar skóla féllu ekki kjósendum í geð
Fréttir • This email address is being protected from spambots. You need JavaScript enabled to view it. • Fyrst birt 04. jún 2014 12:09 • Uppfært 04. jún 2014 12:10
Sigrún Blöndal, oddviti Héraðslistans, segir að svo virðist sem hugmyndir Héraðslistans hafi ekki átt upp á pallborðið hjá kjósendum á Fljótsdalshéraði. Þeir virðist almennt ánægðir með störf meirihlutans.
Héraðslistinn tapaði fjórðungi af fylgi sínu í kosningunum á laugardag og einum fulltrúa, þrátt fyrir að hafa verið í minnihluta undanfarin fjögur ár. Listinn talaði meðal annars fyrir endurskoðun á fræðslustofnunum sveitarfélagsins og sameina grunnskólana í eina stofnun og mismunandi starfsstöðvum.
„Það er augljóst að hugmyndir um samvinnu skóla og skoðun möguleika á sameiningum hafa ekki fallið kjósendum í geð," segir Sigrún.
„Við lögðum einnig ríka áherslu á að efla upplýsingaflæði til íbúa og samráð við þá. Þessar hugmyndir hafa ekki heldur átt nægilega upp á pallborðið.
Niðurstaða kosninganna virðist vera að íbúar á Fljótsdalshéraði eru almennt ánægðir með störf meirihlutans á kjörtímabilinu."
