Anna Alexanders: Við heyrum í einhverjum seinni partinn í dag
Anna Alexandersdóttir, oddviti Sjálfstæðisflokksins á Fljótdalshéraði, segir flokkinn skoða alla möguleika á meirihlutasamstarfi í bæjarstjórn með opnum hug. Farið verður yfir hugmyndir Framsóknarmanna um samstarf allra lista í bæjarstjórn síðar í dag og sömuleiðis möguleikann á áframhaldandi viðræðum við Á-listann.„Við erum opin fyrir að skoða þessi mál, svo framarlega sem samstarfsgrundvöllur er fyrir hendi og gott samstarf á milli flokkanna," segir Anna.
Framsóknarmenn slitu í gær meirihlutaviðræðum við Á-listann og sendu oddvitum Sjálfstæðisflokks og Á-lista drög að samstarfssamningi allra framboða.
Aðspurð segist Anna ekki hafa „haft tök á að skoða það almennilega" en það verði gert síðar í dag. „Við erum opin á að skoða hlutina."
Efstu menn D-lista hittast á fundi eftir hádegið þar sem næstu skref verða ákveðin. „Við heyrum í einhverjum seinni partinn í dag."
Sjálfstæðismenn hafa einnig rætt við Á-listann um myndun meirihluta. „Við ætlum að hittast aftur og skoða málin. Það voru bara þreifingar," segir Anna um fund listanna í gærkvöldi.
Slíkur meirihluti krefðist þátttöku Héraðslistans en flokkarnir hafa tvo menn hver í bæjarstjórninni en Framsóknarflokkur þrjá. Anna segist aðeins hafa rætt stuttlega við fulltrúa Héraðslistans í síma.
Hún segir að tíðindin af meirihlutaslitunum ekki hafa komið sérstaklega mikið á óvart. „Mér fannst þetta taka langan tíma þannig að símtalið kom ekkert mjög svo á óvart þegar ég fékk það."
