Ellefu mínútur frá útkalli þar til slökkviliðið var komið inn
Fréttir • This email address is being protected from spambots. You need JavaScript enabled to view it. • Fyrst birt 14. júl 2014 13:31 • Uppfært 14. júl 2014 18:51
Ellefu mínútur liðu frá því að slökkvilið Vopnafjarðar var kallað út vegna elds í versluninni Kauptúni í nótt þar til fyrstu slökkviliðsmennirnir voru komnir inn og búnir að ná tökum á aðstæðum.
Slökkviliðið fékk útkall klukkan 4:55 um eldinn sem logaði í pappavörum á lager verslunarinnar. Viðvörunarkerfi skynjaði reykinn og gerði stjórnstöð Securitast viðvart sem lét eigendur Kauptúns vita.
Þeir hringdu á slökkviliðið og héldu eldinum í skefjum með slökkvitækjum þar til að hjálpin barst.
„Þetta gekk mjög vel. Fyrstu menn voru komnir inn með reykköfunartæki og búnir að ná tökum á eldinum ellefu mínútum eftir að útkallið kom," segir Sölvi Kristinn Jónsson sem stýrði aðgerðum liðsins í nótt.
Klukkan 5:30 var búið að ráða niðurlögum eldsins en vörurnar sem eldurinn logaði í voru teknar út. Sót og reykur barst um alla búð og ljóst að Kauptún verður að minnsta kosti lokuð í dag.
Sölvi Kristinn segir aðgerðirnar í heild sinni hafa tekið um klukkustund. Hann kann ekki nákvæmar skýringar á skjóti viðbragði slökkviliðsins.
„Við erum vel tækjum búnir og vel æfðir. Þetta eru vanir menn sem eru líka í björgunarsveit og á sjúkrabílnum þannig þeir eru kannski bara á tánum."
Mynd: Örn Björnsson
