Hafa frest til klukkan sex að ná Green Freezer af strandstað
Eigendum flutningaskipsins Green Freezer, sem strandaði í gærkvöldi í Fáskrúðsfirði, var í dag veittur frestur til klukkan sex til að ná skipinu af strandstað. Von er á varðskipinu Þór á strandstað um kvöldmatarleitið.Vettvangsstjórn Landhelgisgæslunnar á staðnum fylgist náið með framvindu mála og er í nánu samstarfi við Umhverfisstofnun, Samgöngustofu, útgerð skipsins, Slysavarnarfélagið Landsbjörgu, lögreglu og aðra viðbragðsaðila, að því er fram kemur í tilkynningu frá gæslunni.
Ekki er talin hætta á bráðamengun á svæðinu og í ljósi þess var fresturinn veittur. Eftir því sem næst verður komið er Green Freezer í eigu pólska skipafélagsins Green Management og hefur það síðan í gærkvöldi unnið að björgunaráætlun.
Björgunarsveitir á Austurlandi voru kallaðar út um klukkan átta í gærkvöldi en skipið rak upp í fjöru eftir vélarbilun. Fjölveiðiskip Samherja, Vilhelm Þorsteinsson hélt auk þess samstundis á strandstað og lóðsbáturinn Vöttur kom á staðinn í morgun.
Varðskipið Þór var beðið um að halda á staðinn og var þyrla Landhelgisgæslunnar var kölluð út. Hún kom á staðinn rétt eftir miðnætti með fulltrúa Landhelgisgæslunnar og Umhverfisstofnunar.
Kafarar Landhelgisgæslunnar komu á staðinn í nótt og könnuðu þeir botn skipsins í morgun. Sjómælingasvið Landhelgisgæslunnar gerði sjókort fyrir svæðið sem unnið verður með í framhaldinu.
Skipið er stöðugt á strandstað og er ekki talin hætta á ferð. Veður hefur verið gott á svæðinu.
Mynd: Björgvin Valur Guðmundsson
