Tvær rútur út af á Fagradal í hálku
Fréttir • This email address is being protected from spambots. You need JavaScript enabled to view it. • Fyrst birt 21. okt 2014 10:51 • Uppfært 21. okt 2014 11:00
Tvær rútur fuku út af veginum yfir Fagradal í morgun. Nokkur óhöpp hafa orðið í mikilli hálku á Austfjörðum í morgun og í gær en ekki hafa orðið slys á fólki.
Rúta með 30 starfsmenn á leið til vinnu í álverinu fór út af á Fagradal í morgun. Önnur rúta var send til að sækja fólkið en ekki vildi betur til en svo að hún fór líka út af veginum. Björgunarsveitarmenn úr Héraði fóru á staðinn og komu fólkinu á leiðarenda.
Hvasst og hált var á Fagradal í morgun þannig að rúturnar fuku út af. Þær verða sóttar þegar vind lægir.
Nokkur óhöpp hafa orðið í dag og í gær í vetrarfærð í umdæmi lögreglustjórans á Seyðisfirði. Flutningabíll fór út af á Háreksstaðaleið í nótt, í gærkvöldi valt bíll á Fjarðarheiði og talsvert var af árekstrum í gærdag. Ekki hafa orðið nein slys á fólki.
Rólegra hefur verið í Eskifjarðarumdæmi en þar voru þó 1-2 útköll á fjallvegi á suðurfjörðum í gær.
