Stöðfirðingar fá stuðningsyfirlýsingu frá starfsfólki Grunnskólans á Reyðarfirði
Um þrjátíu starfsmenn Grunnskóla Reyðarfjarðar skrifa undir stuðningsyfirlýsingu sem þeir sendu starfólki Stöðvarfjarðarskóla þar sem til stóð að hætta kennslu í eldri bekkjum. Reyðfirðingarnir leggjast einnig gegn hugmyndum um sameiningu unglingadeilda.Í yfirlýsingunni er mótmælt hugmyndum um að keyra nemendur 5. – 10. bekkjar Stöðvarfjarðarskóla á Fáskrúðsfjörð „um einn hættulegasta veg landsins."
Þá lýsa starfsmenn skólans á Reyðarfirði þeirri skoðun sinni að mikilvægt sé að „heildstæðu skólastarfi verði haldið úti í öllum byggðarkjörnum Fjarðabyggðar til að styrkja og styðja við byggðarþróun hvers staðar fyrir sig."
Á sömu forsendum er mótmælt hugmynd um að keyra nemendur á unglingastigi í skólum Fjarðabyggðar sunnan Oddskarðs í einn skóla á miðsvæðinu.
Bæjarráð Fjarðabyggðar samþykkti í gær að falla frá hugmyndum um að börnum frá Stöðvarfirði verði keyrt á Fáskrúðsfjörð frá og með næsta hausti.
Einnig hafa verið settar fram hugmyndir um að kanna hagkvæmni þess að sameina unglingastig skólanna á Eskifirði, Fáskrúðsfirði, Stöðvarfirði og Reyðarfirði á einum stað.
Ekkert hefur verið ákveðið í þeim efnum en eftir er að brúa 70 milljóna gat í fjárheimildum til fræðslumála.
Áður höfðu Íbúasamtök Eskifjarðar sent frá sér stuðningsyfirlýsingu á sömu nótum.
