Eftirlitsnefnd með fjármálum sveitarfélaga aðvarar Fljótsdælinga
Eftirlitsnefnd með fjármálum sveitarfélaga hefur sent hreppsnefnd Fljótsdalshrepps aðvörun þar sem rekstur sveitarfélagsins þykir ekki standast jafnvægisreglu sveitastjórnalaga. Sveitarstjórnin bendir á óvenju hátt hlutfall afskrifta sem einn af orsakavöldunum.Samkvæmt sveitastjórnarlögum mega samanlögð heildarútgjöld til rekstrar á hverju þriggja ára tímabili ekki hærri en sem nemur samanlögðum tekjum.
Í bréfi eftirlitsnefndarinnar er bent á að rekstrarniðurstaða ársins 2013 hafi verið neikvæð um rúmar 19 milljónir króna sem hafi ekki verið í samræmi við áætlun. Þá bendi útkomuspá fyrir árið í ár ekki til þess að jafnvægi náist í rekstrinum fyrir árin 2013-2015.
Því er beint til Fljótsdælinga að ná jafnvægi í rekstri sveitarfélagsins fyrir tímabilið 2014-16.
Það hefur vakið athygli að Fljótsdalshreppur sé á vöktunarlista eftirlitsnefndarinnar enda talinn stöndugt sveitarfélag þar sem skuldavið viðmið þess er 4% á meðan mörg önnur sveitarfélög berjast við að komast niður fyrir 150%.
Í svari sveitarstjórnar Fljótsdalshrepps, sem undirritað er af oddvitanum Gunnþórunni Ingólfsdóttur, er bent á að afskriftir sveitarfélagsins séu óvenju stór gjaldaliður. Utan þeirra sé reksturinn í jafnvægi.
Þær hafi verið hærri en ráð hafi verið fyrir gert auk þess sem farnar hafi verið aðrar útgjaldaleiðir í stuðningi við atvinnuuppbyggingu í hreppnum en ráð var fyrir gert, umhverfisstyrkir verið háir þar sem framkvæmdir hafi klárast fyrr en reiknað var með og kostnaður við grunnskólann á Hallormsstað hafi farið fram úr áætlun.
Útkoma ársins 2014 virðist ætla að verða 2,3 milljónum lakari en ráð var fyrir gert sem skýrist af viðhaldið á Hallormsstaðarskóla og viðgerð á ljósleiðara sem skemmdist í flóði. Þá er sleginn sá fyrirvari að uppgjöri vegna breytinga á rekstri Hallormsstaðarskóla sé ekki lokið. Sveitarstjórnin bendir enn fremur á að hreppurinn hafi misst tekjur við breytingar á Jöfnunarsjóði.
Viðurkennt er að útlokað sé að ná jákvæði niðurstöðu fyrir árin 2013-2015. Aðgerðir eru fyrirhugaðar til að snúa við rekstrinum, helstar þær að lækka kostnað við grunnskólahald.
Vonast er til að jafnvægisreglunni verði náð fyrir tímabilið 2015-17 þegar rekstur verði í föstum skorðum.
