Leitað að dýralæknum fyrir Austurland
Matvælastofnum hefur auglýst eftir eftirlitsdýralækni á Austurlandi og dýralækni til að þjónusta mið-Austurland. Dýralæknir á Vopnafirði þjónustar nú einnig hluta úr Þingeyjarsveit.Aðrir dýralæknar stofnunarinnar skiptast nú á um að sinna embættisskyldum héraðsdýralæknisins en Eyrún Arnardóttir, sem gegnt hefur stöðunni, er farin í tímabundið leyfi.
„Markmið okkar er að tryggja sömu þjónustu og áður," segir Hjalti Andrason en umsóknarfrestur um 50% tímabundna stöðu til 1. nóvember 2015 er til 15. desember næstkomandi.
Þá hefur einnig verið auglýst aftur eftir dýralækni til að gera þjónustusamning við fyrir mið-Austurland. Sá samningur hefur verið laus síðan 1. nóvember en ekki tókst að tryggja stöðuna þrátt fyrir auglýsingar.
Með breytingum á lögum sem gengu í gildi 1. nóvember 2011 var umdæmum dýralækna fækkað úr 14 í sex. Um leið var eftirlits- og þjónustuhlutverk dýralækna aðskilið til að koma í veg fyrir að sami dýralæknir hafi eftirlit með þeim sem hann þjónusti.
Í staðinn voru gerðir þjónustusamningar til þriggja ára við sjálfstætt starfandi dýralækna til að tryggja aðgengi að dýralæknaþjónustu í dreifðari byggðum landsins.
Ekki tókst heldur í haust að tryggja dýralæknaþjónustu að fullu í Þingeyjarsýslum en nýverið var samið við dýralækni frá Vopnafirði að sinna einnig Þistilfirði og Langanesi í 50% stöðu.
Þær upplýsingar fengust hjá MAST að unnið sé að gerð tímabundins samnings við dýralækni á Húsavík til áramóta til að aðgengi að dýralæknum verði jafngott og áður á meðan. Þjónustukerfi dýralækna væri annars heilt yfir í skoðun.
