Sigmundur Davíð fluttur í Hrafnabjörg: Góður andi í húsinu og fallegt umhverfi
Sigmundur Davíð Gunnlaugsson, formaður Framsóknarflokksins og oddviti hans í Norðausturkjördæmi, flutti nýverið lögheimili sitt á Hrafnabjörg 3 í Jökulsárhlíð. Hann segist hafa hrifist af umhverfinu í Hlíðinni.„Ég flutti fyrir um mánuði síðan en það hefur legið lengur fyrir að ég væri að flytja á þennan stað enda hef ég verið hrifinn af þessum umhverfi frá því ég kom hingað fyrst og byrjaði að taka þátt í pólitíkinni.“
Jónas Guðmundsson, bóndi á Hrafnabjörgum, er einn af þeim sem hvöttu Sigmund Davíð fyrir fimm árum síðan til að gefa kost á sér sem formaður flokksins.
„Þetta er mjög fallegt hús sem Jónas hefur verið að gera þarna upp. Það er góður andi í húsinu og umhverfið fallegt. Ég kann mjög vel við mig hjá honum þannig að þegar tækifærið á að búa hér gafst þá stökk ég á það.“
Sigmundur Davíð var á Egilsstöðum í gær á sínum síðasta opna fundi fyrir kosningarnar á laugardag en framundan eru leiðtogakappræður í sjónvarpi í kvöld og á morgun.
„Kosningabaráttan hefur snúist um okkar flokk og okkar mál,“ sagði hann og bætti við að fáir efuðust lengur um forsendurnar fyrir nauðsyn þess að ráðast í aðgerðir til lausnar skuldavanda heimilanna sem flokkurinn hefur lagt áherslu á.
Þá væri sýnt að vogunarsjóðirnir myndu vilja komast út með að minnsta kosti hluta af hagnaðinum sem þeir eiga í íslensku bönkunum. Spurning sé hvernig þeir losni og hversu mikið þeir þurfi að gefa eftir. Um útfærsluna sé helst deilt á milli framboða.
„Hagkerfi undir skuldafargi kemst ekki í gang,“ sagði Sigmundur og benti á að heimsþekktir hagfræðingar á borð við Paul Krugman og Joseph Stieglitz hefðu talað á svipuðum nótum.
