Jónína Rós: Ekki sexý að taka til eftir partý
Núverandi ríkisstjórn hefur staðið í miklu og erfiðu tiltektarstarfi. Því er að ljúka en uppbyggingarstarfið er framundan. Kjósendur verða að gera upp við sig hverjir og hvaða hugsjónir verði þá ríkjandi.„Við höfum verið í forustu í tiltektinni. Það er ekki sexý eða flott að taka til eftir partý og enn er bara búið að grófhreinsa.
Við vitum að það á eftir að fínpússa og byggja upp. Að því viljum við koma með hugsjónir okkar um jöfnuð og fjölbreytni að leiðarljósi.“
Þetta sagði Jónína Rós Guðmundsdóttir, þingkona Samfylkingarinnar, á opnum framboðsfundi í Menntaskólanum á Egilsstöðum fyrir skemmstu.
Aðspurð um skattastefnu flokksins fyrir næsta kjörtímabil sagðist hún „stolt af þrepaskiptu skattkerfi“ en skoða mætti upphæðirnar í þrepunum.
„Samfylkingin vill að allir í samfélaginu hafi sem jöfnust tækifæri og að þeir sem hafa meira milli handanna leggi meira til samfélagsins.“
Hægt er að hlusta á framboðsfundinn í heild sinni hér á vef Útvarps Seyðisfjarðar.
