Nálægðin við hreindýr, jöklana og dalina ekki síður söluvænleg en austfirska sumarið
Fréttir • This email address is being protected from spambots. You need JavaScript enabled to view it. • Fyrst birt 19. maí 2013 23:37 • Uppfært 19. maí 2013 23:38
Forsvarsmenn Icelandair hyggja á aukna markaðssetningu á ferðum til Austurlands á veturna á næstu misserum, sérstaklega á Bretlandsmarkaði. Efla þarf framboðið á þeirri afþreyingu sem er í boði allt ársið á svæðinu.
Þetta kom fram í máli Magneu Hjálmarsdóttur, stjórnarformanns Icelandair Hotels, þegar aðalsalur Hótels Héraðs var opnaður á ný eftir endurbætur fyrir skemmstu.
Endurbæturnar voru hluti af endurskilgreiningu vörumerkis hótelkeðjunnar þar sem aukin áhersla er lögð á sérstöðu hvers hótels og nærumhverfis. Þannig hefur hótelið á Egilsstöðum fengið nýtt merki með hreindýri.
Magnea segir merkið endurspegla „vetraráherslu“ Icelandair hyggst fara í átak í markaðssetningu Austurlands í vetrarferðamennsku. „Nálægðin við hreindýrin, jöklana og dalina er ekki síður söluvænleg en austfirska sumarið.“
Hún nefndi hvernig vetrarferðamönnum á Akureyri hefði á fáum árum fjölgað úr 800 í 6000 með markaðsátaki. „Við þurfum þennan hóp líka hingað,“ sagði Magnea.
Til þess að svo megi verða er nauðsynlegt að bæði fyrirtæki í ferðaþjónustu og sveitarfélög sameinist um uppbyggingu. Það gerðist fyrir norðan og skilaði árangri.
„Hér á Austurlandi þurfum við öll í sameiningu að tryggja að áfangastaðurinn standi undir loforðunum um þessa einstöku íslensku upplifun. Þjónustan verður að vera stöðug og það hefur verið galli að ákveðnir hluti hafa ekki verið í boði allt árið.“
