Hækkar um hálfan metra á dag í Hálslóni
Fréttir • This email address is being protected from spambots. You need JavaScript enabled to view it. • Fyrst birt 04. jún 2013 23:59 • Uppfært 05. jún 2013 14:58
Vatnsyfirborð í Hálslóni hækkar um hálfan metra á dag en miklar leysingar eru á vatnasviðið þess. Útlit er fyrir að ekki þurfi að minnka álframleiðslu á Reyðarfirði vegna orkuskorts.
Í frétt á vef Landsvirkjunar kemur fram að á fimmtudaginn var hafi loks farið að hækka í lóninu eftir samfellda lækkun síðan í september.
Lægst fór lónið í um 570 metra yfir sjávarmáli á þriðjudaginn fyrir viku. Það er um tíu metrum neðar heldur en á fyrri rekstrarárum Kárahnjúkavirkjunar.
Mikill snjór er á vatnasvæðinu en hann hefur bráðnað nokkuð í hlýindum síðustu daga. Búist er við að hratt hækki í lóninu næstur vikur ef hlýindin haldast.
Fyrir um mánuði síðan sendi Landsvirkjun frá sér viðvörun þar sem staðan í miðlunarlóninu var mun verri en spáð var. Af þeim sökum var hætta á að orkuskortur frá Fljótsdalsstöð yrði til þess að Alcoa Fjarðaál yrði að draga úr álframleiðslu.
„Í ljósi batnandi stöðu í Hálslóni nú mun ekki þurfa að grípa til boðaðra skerðinga,“ segir í fréttinni.
