Björgunarbátur dró annan bát í gang

Fyrra útkallið var á miðvikudag en báturinn aðstoðaði þá tvo handfærabáta til hafnar á Breiðdalsvík. Stýrisbúnaður annars bátsins bilaði og þegar hinn ætlaði að draga þann til hafnar slitnaði dráttarlínan og flæktist í skrúfuna á honum svo hann varð stjórnlaus.

Aðrir bátar komu þá til hjálpar og drógu þessa tvo í átt til Breiðdalsvíkur. Hafdísin var fyrst björgunarbáta á vettvang og tók við drættinum skammt fyrir utan Breiðdalsvík.

Seinna útkallið var á fimmtudag þegar haft var samband út af vélarvana bát austur af Streiti. Hafdís mætti á staðinn og tók bátinn í tog. Þegar bátarnir voru um það bil hálfnaðir á leið til hafnar hrökk hinn vélarvana bátur í gang.

Á Facebook-síðu björgunarsveitarinnar Geisla, sem sér um Hafdísi, er því haldið fram að sá bátur sé sennilega sá fyrsti í heiminum sem dreginn hefur verið í gang. Hann hélt svo heim til Stöðvarfjarðar fyrir eigin vélarafli.