Austfirskir bændur smala fé sínu niður af fjöllum af ótta við óveður
Fréttir • This email address is being protected from spambots. You need JavaScript enabled to view it. • Fyrst birt 28. ágú 2013 10:41 • Uppfært 28. ágú 2013 10:44
Austfirskir bændur hafa varan á sér eins og kollegar þeirra á Norðurlandi og eru farnir að smala fé sínu til að koma því í skjól undan aftakaveðri sem spáð er um helgina.
Vopnfirðingar eru farnir í Mælifellsheiði fyrr en áætlað var og Fljótsdælingar fóru í morgun upp á heiði til að smala undir Fellum og ráðgera að fara inn í Rana á morgun.
Aðaltilgangur Austfirðinganna er samt að koma fénu ofan af háheiðinni og niður á svæði þar sem útlit er fyrir að veður verði skárra frekar en reka það alla niður í byggð og rétta.
Féð virðist almennt frekar ofarlega á fjöllum enda sumarið verið mjög gott og vart enn komið hret sem hrakið hefur kindurnar heim á leið.
Nokkurt tjón varð á bústofni Austfirðinga þegar aftakaveður gerði fyrstu helgi septembermánaðar fyrir ári en þó ekki í líkingu við það sem varð á Norðurlandi.
Veðurstofan spáir norðvestan 18-23 m/s með rigningu og snjókomu ofan við 200-300 metra yfir sjávarmáli seinni part föstudags og á laugardag. Búist er við að sunnanáttir verði ríkjandi á ný eftir helgina.
