Óljóst neyðarlínusímtal: Lögregla og sjúkraflutningamenn fundu ekki fórnarlambið um nóttina
Í skýrslutöku af lögreglumönnum fyrir Héraðsdómi Austurlands í dag kom fram að brugðist hefði verið við símtali í Neyðarlínuna nóttina sem Karli Jónssyni var ráðinn bani. Áður hafði komið fram við aðalmeðferðina að það var ákærði, Friðrik Brynjar Friðriksson, sem hringdi í 112 um nóttina.Það var vakthafandi lögreglumaður á Egilsstöðum ásamt lögreglumanni á bakvakt sem fóru á staðinn í kjölfar útkallsins. Einnig fóru sjúkraflutningamenn á staðinn. Fram kom fyrir dómi í dag að útkallið hefði verið óljóst en ástæða til að ætla að um alvarlegan atburð væri að ræða. Samkvæmt tilkynningu snerist málið þó um átök í íbúð ákærða, en ekki íbúð fórnarlambsins.
Lögregla hafði afskipti af ákærða á staðnum en hann neitaði þá að hafa hringt. Eftir að hafa kannað vettvang taldi lögregla ekki ástæðu til frekari aðgerða á staðnum og urðu lögreglumenn ekki varir við ummerki um átök í eða við húsið.
Það var síðan morguninn eftir sem nágranni í næstu íbúð sá fórnarlambið liggja í blóði sínu á svölum íbúðar sinnar og kallaði eftir aðstoð lögreglu. Lögreglumenn sem fyrstir voru á staðinn báru að Karl hafi þá augljóslega verið látinn og einnig kom fram í framburði annarra lögreglumanna að á honum voru sýnileg stungusár. Af vegsummerkjum hafi mátt ráða að lík hans hefði verið dregið innan úr íbúðinni og út á svalirnar.
Vakthafandi lögreglumenn á Egilsstöðum tryggðu vettvang en lögreglan á Eskifirði tók við rannsókn málsins með aðstoð tæknideildar frá lögreglunni á höfuðborgarsvæðinu.
Ákærði í málinu var handtekinn strax eftir að lík fórnarlambsins fannst og var það gert í ljósi útkallsins um nóttina. Ákærði var sofandi í íbúð sinni þegar lögregla handtók hann og færði í fangageymslur.
Skýrslutökur í málinu halda áfram í dag en reiknað er með að aðalmeðferðinni ljúki í kvöld.
