Er sumarið búið? Grátt í fjöllum og 60 metra hviður í Hamarsfirði
Haustið virðist gengið í garð á Austurlandi miðað við veður dagsins. Fjöllin eru grá, snjór á fjallvegum og bálhvasst á Suðausturlandi.Í Hamarsfirði voru vindhviður upp á 64 m/s um hádegisbilið. Hviðurnar eru orðnar heldur mildari en vindhraðinn hefur verið yfir 30 m/s að meðaltali frá því um klukkan níu í morgun.
Krapi og snjóþekja er á Fjarðarheiði og Fagradal, hálkublettir á Breiðdalsheiði og þæfingur á Öxi. Snjókoma er á Vatnsskarði og ófært yfir Hellisheiði. Hálkublettir eru á Möðrudalsöræfum og Vopnafjarðarheiði.
Björgunarsveitin Hérað sótti í morgun bíla á Vatnsskarð og tvo á Fjarðarheiði.
Veðurstofan varar við 20-28 m/s og snörpum vindhviðum einkum á sunnanverðum Austfjörðum til hádegis á morgun. Einnig er búist við talsverðri úrkomu austast á landinu, rigningu eða slyddu í byggð og snjókomu til fjalla.
Í gær var um tólf stiga hiti og bjart yfir á mest öllu svæðinu.
