Framsóknarmenn telja Reykjavíkurflugvöll eitt stærsta byggðamál samtímans
Fréttir • This email address is being protected from spambots. You need JavaScript enabled to view it. • Fyrst birt 14. okt 2013 13:05 • Uppfært 14. okt 2013 13:07
Framsóknarmenn í Norðausturkjördæmi telja núverandi staðsetningu Reykjavíkurflugvallar í Vatnsmýrinni í Reykjavík eitt stærsta byggðamál samtímans. Þeir gleðjast einnig yfir góðu gengi í þingkosningunum í vor sem tryggði flokknum sæti í ríkisstjórn.
Þetta kemur fram í stjórnmálaályktun nýafstaðins kjördæmisþings Framsóknarmanna. Þar er staðsetning flugvallarins sögð „grundvallarforsenda þess að Reykjavík viðhaldi hlutverki sínu sem höfuðborg landsins.“
Í ályktuninni er fagnað góðum árangri flokksins í kjördæminu í kosningunum í vor en hann fékk þar fjóra menn kjörna. Lýst er yfir stuðningi við núverandi ríkisstjórn „undir forystu framsóknarmanna til allra góðra verka.“
Kjördæmisþingið leggur áherslu á að stefnu flokksins í byggðamálum verði framfylgt og vegakerfið byggt áfram upp. Sérstaklega er minnst á að kannaðar verði áherslur fyrir göngum undir Fjarðarheiði og nýjum Ólafsfjarðargöngum.
Þingið fagnar sérstaklega fyrirhuguðum framkvæmdum á Bakka við Húsavík en jafnframt ítrekað að flokkurinn sé grænn flokkur sem styðji „atvinnuuppbyggingu og orkunýtingu í sátt við náttúru landsins.“
