Æðavarp í Kollaleiru boðið út næstu tvö árin

Þessi ákvörðun var tekin í vikunni og það er ástæða þess hve varpið er boðið út í tiltölulega skamman tíma eða aðeins tvö ár en varp er að hefjast um þessar mundir ef það er ekki þegar hafið í leirunum við Reyðarfjörðinn.

Æðavarp hefur vaxið og dafnað á þessu svæði um fimmtán ára skeið en æðarfuglinn er friðlýstur fugl sem varpar þeim skyldum á herðar sveitarfélagsins að gæta hans og vernda meðan á varptíma stendur.

Skipulags- og framkvæmdanefnd Fjarðabyggðar taldi í áliti sínu vegna þessa ekki síður mikilvægt að gæta að jafnrétti almennings að nýtingarrétti á verðmætum á umræddu svæði. Þannig sé það fyrir bestu að tiltekinn aðili sjái um svæðið og hugsi um og hlúi að fuglinum yfir varptímabilið. Á þetta féllst bæjarráð.

Ráð er fyrir gert að bjóða varpið aftur út að tveimur árum liðnum og þá til mun lengri tíma.

Leirurnar í landi Kollaleiru er vinsæll varpstaður æðafugla en gæta þarf vel að því stutt er í atvinnu- og athafnasvæði eins og sést á meðfylgjandi mynd Skipulags- og framkvæmdanefndar.