Áforma að vera með stríðsárasýningu í bragga í sumar
Innan Fjarðabyggðar er nú unnið að áætlunum um að sýning Stríðsárasafnsins í sumar verði í þeim bragga sem enn stendur á safnasvæðinu. Safnið er á hálfgerðum hrakhólum á meðan ekki er tekin ákvörðun um hvar þar verður til framtíðar.Húsnæðismál Stríðsárasafnsins hafa verið til skoðunar í nokkurn tíma. Haustið 2022 urðu miklar skemmdir á safnasvæðinu í hvassviðri og varð það meðal annars til þess að í fyrra var safnið ekki opnað heldur sett upp útisýning í miðbænum. Áður en foktjónið varð var staðan þó orðin sú að safnið var í raun vaxið upp úr húsnæði sínu og tími kominn á verulegt viðhald.
Bæjarráð Fjarðabyggðar samþykkti á fundi sínum á mánudag að halda áfram vinnu við tillögu, sem lögð var fram í minnisblaði bæjarritara nýverið, um að opna sýningu í sumar í þeim bragga sem enn stendur á safnasvæðinu.
Flytja á þann safnakost sem völ er á þangað yfir og sýna í sumar, eða þar til nánari ákvörðun liggur fyrir. Fyrri aðalbygging safnsins verður nýtt undir móttöku og snyrtingar en sýningarsalurinn þar undir geymslu. Framkvæmdasvið sveitarfélagsins vinnur nú að nánari útfærslu og kostnaðarmati á hugmyndunum en gróft mat liggur fyrir. Gert er ráð fyrir að framkvæmdum verði lokið í byrjun júní til að sýningin verði opin í sumar.
Í minnisblaðinu er erfið staða safnsins rakin. Ekki hafi verið gert ráð fyrir fjármagni til uppbyggingar eða viðhalds þess á fjárhagsáætlun þessa árs. Rætt hafi verið um að kaupa húsnæði í miðbænum undir safnið og stefnt á að leggja þær hugmyndir fyrir íbúafund, sem ekki hefur enn verið haldinn.
Þá hafi stjórn safnsins viljað að húsnæði fyrir það yrði haft í huga við endurskoðun skipulags miðbæjar Reyðarfjarðar. Hún er ekki hafin og engin áform um hana.
Í niðurlagi minnisblaðsins segir að eyða þurfi óvissu um framtíðarstaðsetningu safnsins með að taka bindandi ákvörðun um uppbyggingu. Nái áætlunin yfir langan tíma sé hægt að dreifa kostnaðinum á fleiri ár.
Mynd: Austurland.is
