Áfram snjóflóðahætta á Austurlandi
Sökum rigninga og almennra hlýinda á Austurlandi næstu dægrin verður áfram nokkur snjóflóðahætta viðvarandi að mati Veðurstofu Íslands. Sérstaklega er hætta á votflóðum í neðri hluta hlíða.
Þrjú minniháttar flekasnjóflóð urðu um helgina við bæði austfirsku skíðasvæðin í Stafdal og Oddsskarði. Í öllum þeim tilvikum um að ræða skíðamenn sem voru á ferð utanbrautar en ekki á sjálfum troðnum skíðasvæðunum. Eitt flekaflóð féll einnig í Stafdalnum fyrir rúmri viku síðan vegna þess sama. Einn skíðamaður varð undir um helgina en slasaðist ekki alvarlega þó lemstraður væri.
Veðurstofan metur hættu á snjóflóðum áfram töluverða bæði í dag og á morgun en hættan fer svo minnkandi á nýjan leik á miðvikudaginn kemur. Þar kemur til léleg binding snjós sem féll um helgina við eldri snjó sem gekk gegnum hlákutíð snemma í síðustu viku.
Tekið er fram að spáin er einkum gerð með ferðafólk í fjalllendi í huga og tekur bæði til hugsanlegra flóða af mannavöldum auk veðurtengdra flóða. Spáin þó ekki sérstaklega lýsandi fyrir snjóflóðahættu í byggð eins og það er orðað.
Hlýindakafla er spáð út þessa viku á Austurlandi öllu, allt að sjö til átta stiga hita alla næstu daga og hægviðri að mestu.