Alda Marín nýr fulltrúi sveitarstjóra á Borgarfirði eystri
Fréttir • This email address is being protected from spambots. You need JavaScript enabled to view it. • Fyrst birt 11. jún 2024 09:55 • Uppfært 11. jún 2024 10:03
Alda Marín Kristinsdóttir hefur verið ráðin í stöðu fulltrúa sveitarstjóra á Borgarfirði eystri í stað Jóns Þórðarsonar sem gengt hefur því starfi frá sameiningu fjögurra sveitarfélaga undir hatt Múlaþings.
Alda þekkir vel til enda verið búsett í þorpinu síðustu sex árin og starfaði um tíma sem verkefnastjóri þegar Borgarfjörður eystri tók þátt í byggðaverkefninu Brothættar byggðir. Þá hefur Alda ennfremur gert sig gildandi í heimastjórn þorpsins og komið að ýmis konar stefnumótun þar síðustu ár.
Síðustu misserin hefur hún starfað fyrir Austurbrú í markaðsstörfum og heildar stefnumótun fyrir Austurland allt. Státar hún af gráðu í ferðamálafræðum frá Háskólanum að Hólum og starfaði um tíma sem sölu- og markaðsstjóri á Hótel Holti í Reykjavík.
