Allar austfirsku útgerðirnar langt komnar með makrílkvótann
Allar útgerðir á Austurlandi sem gera út á makríl eru langt komnar með þann kvóta sem þeim var úthlutað.
Fyrr í vikunni greindi Austurfrétt frá því að glimrandi vel gengi að veiða og vinna makríl hjá Síldarvinnslunni í Neskaupstað. Svo vel reyndar að góðar líkur væru á að kvótinn kláraðist strax í þessum mánuði þegar algengara er að þær veiðar teygist vel fram í september.
Sama er uppi á teningnum hjá öðrum stærri útgerðum á Austurlandi samkvæmt svörum við fyrirspurnum.
Hjá Eskju á Eskifirði hefur sömuleiðis gengið mjög vel og þar eiga menn aðeins um 2.500 tonn eftir af sínum kvóta. Hjá Loðnuvinnslunni á Fáskrúðsfirði er aðeins einn túr eftir á miðin í Smugunni áður en kvóti þeirra klárast en þegar hafa veiðst um 6.000 tonn. Þá segir Ingimundur Ingimundarson, útgerðarstjóri Brims, að vel gangi á Vopnafirði. Þegar um 20 þúsund tonn komin á land og einungis eftir að veiða um sex þúsund tonn áður en yfir lýkur.
