Austfirðingar hvattir til að vera heima í fyrramálið

Þetta kemur fram í yfirliti frá Vegagerðarinnar og tilkynningu frá aðgerðastjórn almannavarna á Austurlandi. Appelsínugul veðurviðvörun hefur verið gefin út fyrir Austurland og Austfirði frá klukkan sjö í fyrramálið til 13:30.

Aðgerðastjórnin segir að á þessum tíma verði ekkert ferðaveður, hvort sem er innanbæjar eða utan,. Eru íbúar því hvattir til að halda sig heima í fyrramálið og þar til veðrið er gengið yfir.

Vegagerðin hefur gefið út að vegir á Austurlandi verði lokaðir frá klukkan átta í fyrramálið. Nokkrar leiðir eru skilgreindar sérstaklega. Möðrudalsöræfi loka klukkan sex, Fjarðarheiði og vegurinn frá Höfn til Breiðdalsvíkur klukkan sjö og Fagridalur klukkan átta.

Ekki er von á nýjum upplýsingum fyrr en eftir hádegi. Bent er á að fjallvegir kunni að verða lokaðir fram eftir degi og jafnvel allan daginn.

Veðurstofan hefur gefið út appelsínugula viðvörun frá klukkan sjö í fyrramálið til 13:30 fyrir Austurland og Austfirði. Á þessum tíma er spáð suðaustan átt með meira en 20 m/s í meðalvindhraða og mikilli snjókomu.

Um eða upp úr hádegi dúrar í um tíma en þegar líður á daginn er víða von á hvassri suðvestan átt sem ekki lægir fyrr en um kvöldmat.

Íbúar hafa verið hvattir til að hefta lausamuni til að koma í veg fyrir foktjón. Stjórnendur fyrirtækja og stofnana, sem tryggja þurfa órofinn rekstur, hvattir til að gera ráðstafanir.

Ljóst er orðið að skólahald fellur víða niður á svæðinu í fyrramálið. Frekari upplýsingar verða sendar foreldrum og forráðamönnum síðar í kvöld eða fyrramálið. Þeir eru hvattir til að fylgjast með tilkynningum á heimasíðum viðkomandi skóla.

COVID sýnataka á vegum Heilbrigðisstofnunar Austurlands, (HSA), sem skipulögð var á morgun fellur niður.