Austurland trúlega heldur á eftir í faraldrinum
Fréttir • This email address is being protected from spambots. You need JavaScript enabled to view it. • Fyrst birt 16. mar 2022 09:11 • Uppfært 16. mar 2022 10:02
Ríflega 250 Covid-19 sýni greindust jákvæð á Austurlandi á mánudag. Líklegt þykir að toppi faraldursins verði náð heldur síðar á Austurlandi heldur en á landsvísu.
Þetta kemur fram í tilkynningu frá aðgerðastjórn almannavarnanefndar Austurlands.
Á mánudag var tekið 331 hraðpróf, þar af voru 256 jákvæð eða 77%. Hlutfallið var lægra, 67% fyrir viku en þá voru fleiri sýni tekin. Til viðbótar við þetta taka margir Covid-próf í heimahúsum en ekki er vitað hve mörg smit greinast þar.
Í tilkynningunni kemur fram að svo virðist sem toppnum sé að verða náð í nýgengi smita á landsvísu en sennilega sé Austurland aðeins á eftir.
Þá er greint frá því að áfram sé afar viðkvæmt ástand í heilbrigðiskerfi landsins og þar sé Heilbrigðisstofnun Austurlands engin undantekning. Dag hvern sé fjöldi starfsfólks frá vinnu vegna veikinda. Ástand á sumum hjúkrunarheimilum hafi verið mjög erfitt, á sjúkradeildinni í Neskaupstað og sumum heilsugæslum.
Þess vegna hvetur aðgerðastjórnin íbúa til að viðhafa persónulegar sóttvarnir sérstaka áherslu á fjarlægð, grímunotkun, handþvott og sprittnotkun. Á það til að mynda við í verslunum og þar sem margir koma saman, sumir mögulega með undirliggjandi sjúkdóma og því viðkvæmari fyrir smiti en ella. Minnt er á að taka Covid-próf eða fara í sýnatöku verði einkenna vart.
„Þetta er vonandi að hafast hjá okkur og mun gera það með samstilltu átaki okkar allra, þar sem hver gætir að sér og að náunga sínum í leiðinni.“
