Berglind Harpa gefur kost á sér í oddvitasætið

Þetta kemur fram í tilkynningu frá henni. Berglind Harpa sinnir einnig formennsku í byggðaráði og heimastjórn á Seyðisfirði, auk þess að vera varaformaður í svæðisráði Austursvæðis Vatnajökulsþjóðgarðs. Árin 2018-2020 var hún bæjarfulltrúi á Fljótsdalshéraði ásamt því að sinna formennsku í fræðslunefnd.

Berglind er 46 ára hjúkrunarfræðingur með meistaragráðu í heilbrigðisvísindum með áherslu á stjórnun innan heilbrigðisþjónustunnar. Hún starfar sem forstöðumaður í dagþjónustu eldri borgara á Egilsstöðum.

„Mikil áhersla er lögð á sameiningar sveitarfélaga í dag og með henni kemur fram gríðarlegur kraftur vegna samlegðar og aukins fjármagns í þau uppbyggingarverkefni sem veita íbúum betri lífsskilyrði.

Heimastjórnir í hverjum byggðakjarna Múlaþings hafa sannað sig og sameiningin tekist ákaflega vel þrátt fyrir áföll vegna náttúruhamfara og alheimsfaraldurs.

Mikil uppbygging er innan Múlaþings, stór tækifæri og framkvæmdir eru víða í gangi innan sveitarfélagsins og öflugar samgöngubætur milli byggðarlaganna fara í útboð á þessu ári.

Tækifæri landsbyggðarinnar hafa aukist gríðarlega þrátt fyrir erfiða tíma vegna COVID-19. Samkomutakmarkanir ýttu af stað viðurkenndum tæknibreytingum í heimsfaraldrinum sem opna á fjölda starfa óháð staðsetningu, tækifærum til menntunar í heimabyggð og öfluga fjarþjónustu.

Þetta er fagnaðarefni fyrir landsbyggðina og sveitarstjórnarfólk verður að standa vörð um að þessi þróun eflist enn frekar í þessa átt,“ segir Berglind.

Hún leggur áherslu á að standa vörð um þau tækifæri sem eru framundan, framkvæmdir, ábyrgan rekstur og alhliða uppbyggingu innan alls sveitarfélagsins.

Valið verður á framboðslistann í prófkjöri sem haldið verður 12. mars.